Merong christmas rush sa aking isip. At jingle bells sa aking dibdib.

Mukhang in lab na naman ang manyak na ito. Parang pasko sa saya. Parang naka denggoy ng regalo sa ninong ang pakiramdam. Parang gusto ko maglagay ng isang milyong mistletoe sa bahay. At sa bahay ng kapitbahay. At sa buong baranggay.

Hay… pwede na ko mag celebrate ng pasko ngayong Septyembre. Uunahan ko na ang mga krismas rapol sa TV, ang mga pakulong bargain sa mall, ang mga pagpapa ilaw ng mga parol. Kasi sa wari ko pinapana ang aking puso ng siyam na reindeer. Pinapana ito ng paulit ulit at hindi ako umiilag.

Mas masaya sana kung merong snow. Maglalaro tayo ng snowball kasama si snowman. Maghahabulan at titirahin kita ng aking ice balls. Buong araw tayong magkayakap na naka earmuff. Magkakape tayo, magku-kwentuhan, maglalampungan. Magtatalukbong at magkukulong sa kwarto. At manginginig sa lamig dahil hindi pala uso dito ang fireplace.

Mangangaroling ako para me pang noche buena tayo. Gagalugarin ko maging ang kabilang ibayo para maiparinig lang ang walang kamatayang Ang Pasko Ay Sumapit. Alam ko namang sintunado talaga ako at ayon sa mga hurado e puro sharps at flats lang ang lumalabas sa aking vocal chords. Pero lalakasan ko na lang ang tunog ng mga piniping tansan at magdadala ako ng maraming back-up. Back-up para barahin ang hindi magbibigay sa akin.

Haharangin ko si Santa Klaws para ako na mismo ang mamumudmod ng regalo. Napansin ko kasing yung mga merong chimney lang ang nabibigyan ni Santa. Naiintindihan ko naman yun dahil alangan namang dumaan sya sa kubeta. Pero sana dapat ika nga e patas. Dahil kung ako yan sigurado mabibigyan maging ang taga Payatas.

Padadalhan kita ng maraming krismas cards. Oo alam kong korni ito at hindi na uso. Pero hayaan mo na at makaluma talaga ako. Pipiliin ko yung mga cards na maraming puso para sakop na pati valentines. Para kung sakaling magdalawang isip ka at iwan ako, kung pwede, gawin mo lang matapos ang Pebrero.

Ito ang christmas rush sa aking isip. At ikaw ang jingle bell sa aking dibdib.

Kaya gusto kong ipagdiwang na ang krismas sa araw na ito. Now na. Baka hindi umabot ang pakiramdam na ito sa araw na ipinanganak ang taga pagligtas ng mundo.

At kapag nagkaganun, malamang magiging wasted uli ang pasko ng manyak na ito.