Hindi ako mataba. Pero hindi ibig sabihin na hindi ako tataba. Kaya naman ngayon ay medyo nagdadalawang isip ako kung makikiuso ba ko sa tinatawag na pagpapagutom diet..

Matakaw daw ako sa pagkain. Hindi. Hindi totoo yun. Ang sabi naman ng ilang natitirang naturingang kaibigan ko parang patay gutom ako kung tsumibog. Ows, sabi ko. Ganado lang ako. Ayoko lang na me natirang pagkain sa plato kaya't kung minsan medyo ako yung huli matapos.

Ewan ko lang kung bakit nauuso ang pagdi dyeta o yung pinipili mo lang ang iyong kinakain. Hindi ba nila alam na mahal na ang pagkain ngayon? Parang bumulusok ang presyo ng lahat? Gustuhin man ng ibang bumili ng mga karneng mataas sa kolesterol at sa taba e malamang hindi na praktikal. Ito kaya ang dahilan at nauso itong pagpapagutom diet.

Ayon sa mga me pakana ng dieting, para hindi tumaba, iwasan ang kanin, softdrink, white bread, sugar, powder juice, junk food, pork, beer, ad infinitum. Andami naman. Papayat nga ako nito. Payat na, tirik pa ang mata. Kaya nga ayoko magbasa ng mga tungkol sa kalusugan e. Gusto lang ata nila akong turuan magpakamatay ng hindi ko napapansin.

Kaya kalaban ko yang diyeta diyeta na yan. Hindi makatao. Gusto ko din ng prutas at gulay dahil masustansya at di nagdaragdag ng timbang. Pero dahil nagpapaligsahan na din ito sa presyo ng bigas, gasolina, tuition fee, at haircut, nahihirapan na akong lunukin ito. Mahal talaga ang mag diyeta. Pang mayaman. Nagtityatyaga na lang ako sa mga instant pancit cantot canton. Ito ata ang sikreto ng aking kakisigan abs.

Kung gusto mong makontrol ang dami ng iyong kinakain, gayahin ako, wag kumaing mag-isa. Kelangan me kasama ka. Mas marami, mas mabuti. Sa ganung paraan malilimutan mo ang iyong manners at kelangan mo na makipag agawan ng pagkain kung gusto mo pang mabuhay.

Nakakatulong din ang mahabang oras na panonood ng tv. Dito tutulo ang iyong laway sa inggit sa mga buto’t balat na modelo ng mga pampapayat na inumin at gamot. Pero wag kang mag panic para bilhin ang kanilang iniendorso, malamang hindi ito ang dahilan ng magandang katawan nila. Ituloy lang ang panonood ng tv. Ang pagpupuyat ay isa sa mga epektib na paraan kung bakit bumabagsak ang timbang ng isang tao maliban sa pagdu droga.

Sinusunod ko din ang oras ng ayuno tuwing Ramadan. Ito’y bilang pakikiisa sa mga kaibigan kong muslim na magagaling magbenta. Walang pagkain simula madaling araw hanggang alas sais ng gabi. Tubig lang. Subalit sadyang mahina ako sa makamundong tawag ng aking kalamnan. Wala pang tanghali, patago akong bumibira ng kain sa kusina.

Kaya nga tsaka na siguro ang diet. Kung mataba na ako. . Hahayaan ko na munang ang katawan katakawan ko ang mangibabaw sa sanlibutan. Basta.